Die Samaritane glo in Jesus

In die eerste verse van Johannes 4 lees ons dat Jesus se dissipels ook begin het om mense te doop en te leer.  Hulle het begin eienaarskap neem om Jesus in sy bediening te help.  Dit is natuurlik ‘n goeie ding.  Jesus se werk is aansteeklik en mense begin daaraan deelneem.  Die Joodse godsdienstige leiers het egter nie gehou van die aftrek wat Jesus gekry het nie en wou die groeiende beweging stuit.

Jesus se bediening en die werk van die Here was in gedrang.  Die godsdienstige leiers wou hom doodmaak en  Jesus en sy dissipels moes noodgedwonge vlug.  Hulle gaan toe terug Galilea toe, daar waar Jesus se bediening begin het en waar mense meer ontvanklik was vir Sy boodskap. 

Dan staan daar hy “MOES” deur Samaria gaan.  Ons besef dat dit nie werklik, prakties gesproke so is nie.  Samaria was eintlik ‘n bietjie van ‘n ompad.  Miskien was dit ‘n veiliger pad met die dat hulle eintlik besig is om te vlug.  Op die oog af is hulle deur omstandighede geforseer om so te reis.  Samaria lyk dan na ‘n plek wat net daar is om deur te vlug...  Dis nie die doelwit van Jesus se bediening nie.  Jesus gaan die Jode daar in Galilea bedien en dan gaan sy gevolg groei ens.  Dis waarskynlik hoe die dissipels dit sou sien.

Oppad deur Samaria, stop hulle by ‘n dorpie.  12uur die middag, oor die hitte van die dag.  Jesus is doodmoeg en Hy moet eers ‘n bietjie rus.  Hy gaan sit toe by ‘n put omdat Hy moeg was en ontmoet daar ‘n Samaritaanse vrou.  Hy vra toe vir haar water, want Hy was dors.  En daar, deur ‘n spontane gesprek, gebeur die werk van God.  Hierdie verlore vrou word gevind!  God het hierdie slegte situasie en omstandighede en Jesus se moegheid gebruik om Sy oes in te samel...

Hoor weer mooi, Hy het juis Jesus se menslikheid en moegheid hier gebruik, op ‘n plek en met iemand wat ‘n mens nie sou verwag nie.  Wat die dissipels beslis nie sou verwag nie.

Die dissipels se reaksie van verbasing en ‘n gebrek aan belangstelling onderskryf dit.  Hulle vra nie eers wie die vrou is of waarom Jesus met haar praat nie.

Lees nou Johannes 4:27-42

Die Samaritane glo in Jesus

²⁷Net toe het sy dissipels teruggekom en hulle was verbaas dat Hy met 'n vrou praat. Tog het niemand vir haar gevra: “Wat wil jy hê?” of vir Hom: “Waarom praat U met haar?” nie.

²⁸Die vrou het toe haar waterkruik net daar laat staan en na die dorp toe gegaan en vir die mense gesê: ²⁹“Kom kyk, hier is 'n man wat my alles vertel het wat ek gedoen het. Is Hy nie miskien die Christus nie?”  ³⁰Die mense het toe uit die dorp uit na Jesus toe begin kom.

³¹ Intussen het sy dissipels by Hom aangedring: “Rabbi, eet tog 'n stukkie.”

³²Maar Hy sê vir hulle: “Ek het voedsel om te eet waarvan julle nie weet nie.” ³³Die dissipels sê toe vir mekaar: “Sou iemand dalk vir Hom iets te ete gebring het?” ³⁴Maar Jesus het vir hulle gesê: “My voedsel is om die wil te doen van Hom wat My gestuur het, en om sy werk te voltooi.

 ³⁵Sê julle nie: ‘Nog vier maande, dan is die oes daar’ nie? Maar Ek sê vir julle: Kyk daar, kyk na die lande; hulle is ryp vir die oes. ³⁶Nou al ontvang die man wat oes, sy loon en samel hy die oes in vir die ewige lewe. So is die een wat saai, en die een wat oes, saam bly. ³⁷Hier is die gesegde waar: ‘Die een saai, en die ander een maai.’ ³⁸Ek het julle gestuur om 'n oes in te samel waaraan julle nie gearbei het nie.  Ander het gearbei, en julle pluk die vrug van hulle arbeid.”

³⁹Baie van die Samaritane in daardie dorp het tot geloof in Jesus gekom op grond van die woorde van die vrou wat getuig het: “Hy het my alles vertel wat ek gedoen het.” ⁴⁰ Toe die Samaritane by Hom kom, het hulle by Hom daarop aangedring om by hulle te bly. Hy het twee dae daar gebly. ⁴¹ Nog baie meer van hulle het toe tot geloof in Hom gekom op grond van wat Hy gesê het; ⁴² en hulle het vir die vrou gesê: “Ons glo nie meer op grond van wat jy vertel het nie, want ons het self na Hom geluister, en ons weet dat Hy waarlik die Verlosser van die wêreld is.”

Lees die gedeelte 3 keer deur. Neem nou tyd vir stilgebed. Dink gewoon aan wat jy gelees het. Is daar ‘n spesifieke frase of woord wat vir jou uitstaan? Fokus jou gedagtes net op die enkele frase of woord. Luister in die stilte na wat die Here hierdeur vir jou wil sê. (Kyk of jy so 2min in stilte kan deurbring terwyl jy dink oor wat jy gelees het.)

Wat bedoel Jesus as Hy sê hy het voedsel om te eet waarvan die dissipels nie weet nie?

Hoekom verstaan die dissipels Hom verkeerd, wat het hulle gemis?

Die Israeliete was oorwegend 'n boeregemeenskap.  Daarom het hulle 'n gesegde gehad wat boere goed verstaan.  Hulle sou sê: "Nog vier maande, dan is die oes daar." 

Hulle het geweet dat wanneer 'n mens klaar gesaai het, jy niks anders kan doen as om te wag nie.  Dit sou nie help om kriewelrig en ongeduldig te raak nie, 'n mens kon net wag en bid vir reën.   Daarom het hulle wanneer iemand haastig of ongeduldig was of vroegtydig aan die werk wou spring gesê: "Nog vier maande dan is die oes daar."  Dit was 'n manier om te sê:  "Jy kan nou niks doen nie, wag..."

Die dissipels het die pad deur Samaria gesien as so 'n 'vier maande' tydperk van rus. Die werk van die Here is in Jerusalem en Samaria, daar by die Jode, die mense vir wie Jesus gekom het...  Jesus wat by die put gaan sit om krag terug te kry bevestig dit.  Hy het nie met 'n megafoon dorp toe gegaan om die Samaritane te bearbei nie.  Hy was moeg en dors en wou rus daar...

Waarvoor maak Jesus sy dissipels se oë oop deur te sê: "Kyk na die lande, hulle is ryp vir die oes!"  ?

Dink oor jou dag wat verby is...  Was daar tye wat jy moeg was en moes rus?  Het jy iewers by 'n 'put' gaan sit?  Het jy iemand daar ontmoet?  Miskien het jy verby die persoon gekyk.  Dalk was Jesus ook daar en Hy het vir jou water gevra, maar jy het nie na Hom opgelet of besef dit was Hy nie.  Jou gedagtes was by al die belangrike take wat jy nog moes gaan doen.  Jou fokus was op die oes wat oor vier maande moet inkom. 

Probeer om hierdie week meer oplettend te wees.  Wanneer jy op plekke is wat vir jou onbelangrik lyk, soos die lang tou by die bank of in Pick & Pay.  Die rit skooltoe om jou kind af te laai...  (Miskien het hy/sy 'n behoefte?)  Daar is nog vele voorbeelde om te noem.  Probeer om op te let wat gebeur daar waar jy nie gewoonlik kyk nie.  Kyk watter oomblikke en geleenthede gee die Here selfs deur jou moegheid en swakheid...

Wat beteken dit vir jou om te weet dat jy nie gesaai het nie en dat die oes eintlik die Here se werk is?  (Dink ook prakties aan die hand van hierdie teks.  Wat is die implikasies, waar en hoe werk die Here en op watter manier kan ons aan Sy werk deelneem?)

Die reiniging van die tempel

Johannes 2:12-25

12	Hierna het Hy, sy moeder, sy broers en sy dissipels na Kapernaum toe gegaan, maar hulle het nie baie lank daar gebly nie.
13	Die paasfees van die Jode was naby, en Jesus het daarvoor na Jerusalem toe gegaan.
14	Op die tempelplein het Hy die verkopers van beeste, skape en duiwe gekry en die geldwisselaars wat daar sit.
15	Toe het Hy met toutjies 'n sweep gemaak en almal uit die tempel uitgejaag, ook die skape en die beeste. Die geld van die geldwisselaars het Hy op die grond gegooi en hulle tafels omgekeer.
16	Vir die mense wat die duiwe verkoop het, het Hy gesê: “Vat hierdie goed hier weg! Moenie die huis van my Vader 'n besigheidsplek maak nie.”
17	Toe het sy dissipels daaraan gedink dat daar geskrywe staan: “Die liefde vir u huis verteer my.”
18	Maar die Jode het Hom aangespreek en vir Hom gesê: “Met watter wonderteken kan u vir ons bewys dat u hierdie dinge mag doen?”
19	Jesus het hulle geantwoord: “Breek hierdie tempel af en in drie dae sal Ek hom oprig.”
20	Die Jode sê toe: “Ses en veertig jaar lank is daar aan hierdie tempel gebou, en u sal hom in drie dae oprig?”
21	Met “hierdie tempel” het Hy egter sy liggaam bedoel.
22	Later, nadat Hy uit die dood opgewek is, het sy dissipels daaraan gedink dat Hy dit gesê het, en hulle het die Skrif en die woorde van Jesus geglo.
23	Terwyl Jesus vir die viering van die paasfees in Jerusalem was, het daar baie mense tot geloof in Hom gekom toe hulle die wondertekens sien wat Hy doen.
24	Maar Hy het Hom nie op hulle verlaat nie, omdat Hy geweet het hoe hulle almal is.
25	Hy het nie nodig gehad dat iemand Hom iets van 'n mens vertel nie, want Hy het self geweet hoe mense is.

Verlede week:

Ons het verlede week uit Joh. 2:1-11 gelees.  Die verhaal begin met die woorde: “Op die derde dag...”.  So gee die Evangelie skrywer vir ons klaar ‘n idee van waaroor die verhaal eintlik gaan.  Dit gaan oor Jesus se kruisiging en opstanding.  Die kruisiging en opstanding word vergelyk met Jesus wat die Jode se reinigingskanne vol water maak en in wyn verander.  Die seremoniemeester is so beïndruk met die wyn dat hy eintlik sy spyt uitspreek oor hy nog kan onthou hoe die ou wyn geproe het.  Dit sou vir hom beter wees om eers dronk te word voor hy daardie slegte ou wyn moes drink, sodat hy dit nie kon proe nie.

In kort, Jesus bring ‘n nuwe manier van leef.  As ons Jesus eers ken, is niks wat voorheen vir ons waarde gehad het, meer dieselfde nie.  Alles steek af teenoor die lewe wat ons in Jesus kry.

Hierdie week:

Lees die gedeelte 3 keer deur.  Neem nou tyd vir stilgebed.  Dink gewoon aan wat jy gelees het.  Is daar ‘n spesifieke frase of woord wat vir jou uitstaan?  Fokus jou gedagtes net op die enkele frase of woord.  Luister in die stilte na wat die Here hierdeur vir jou wil sê.  (Kyk of jy so 2min in stilte kan deurbring terwyl jy dink oor wat jy gelees het)

Die verhaal gaan verder en vertel vir ons van Jesus wat saam met sy gesin ‘n kort besoek aan Kapernaum maak voor hulle verder reis.  Die roete wat hulle reis maak nie rerig sin nie.  Die indruk is dat Jesus sy tuisdorp doelbewus vermy en dat sy fokus eerder is op dit wat Hy in Jerusalem moet gaan doen.  Die normale roete reguit na Jerusalem sou Jesus juis oor Nasareth neem. 

Om ons te help om hierdie opmerking te verstaan, kan ons kyk na Psalm 69:8.  Later in die gedeelte is ook ‘n direkte verwysing na Psalm 69:9. 

Lees rustig Psalm 69 deur.  Hoeveel van wat jy lees stem ooreen met Jesus se lewe of laat jou daaraan dink?  (Maak ‘n lys van als in die gedeelte wat jou aan Jesus en spesifiek aan ons Skriflesing vir die week laat dink)

Die tempel wat Herodus laat bou het, was ‘n indrukwekkende gebou.  Herodus het die Jode weer op die map gesit.  Hy was goeie vriende met Julius Ceasar en selfs die bekende koningin Cleopatra se verhouding met ‘n voorste Romeinse generaal was nie genoeg om haar teen die mag van Herodus te beskerm nie.  Sy moes groot dele van haar grondgebied aan Herodus afstaan.  Herodus het regoor die antieke wêreld gesag afgedwing en was baie geliefd.  Dis te danke aan hom dat die Olimpiese spele nog voortbestaan het in sy tyd.  Hy is ook die een wat voorgestel het dat die persone wat tweede en derde kom ook pryse moet kry.  Mense van oor die hele wêreld het te danke aan die slim, sportiewe, aantreklike en uitgaande koning Herodus na die tempel toe gestroom.  Hoe wonderlik moes dit nie vir die Jode wees nie.  Die hele wêreld het gekom om van hulle God te leer en aan Hom offers te bring.  Dit word vertel dat die bloed van al die offers wat dag in en dag uit daar gebring is, soos ‘n rivier deur die Hinomdal gestroom het.  Die vrugbaarheid van die grond in die Hinomdal word tot vandag toe toegeskryf aan al die bloed wat daar gevloei het.

Hoekom dink jy sou Jesus hom dan vererg oor die populariteit van die tempel?  (Skryf neer wat jy dink die rede hiervoor kon wees)

Vers 17 in die NAV lees: “Die liefde vir u huis verteer my”.  Die vertaling is egter verkeerd.  Die skrywer van Johannes het doelbewus die oorspronklike woorde van die Psalm verander, sodat daar staan: “Die liefde vir u huis sal my verteer”.  Wat het uiteindelik met Jesus gebeur a.g.v. sy optrede by die tempel?

Lees Spreuke 1:20-33.  Sien jy enige ooreenkomste tussen mense se reaksie op wysheid en hulle reaksie op Jesus?

Saamvat:

Hoe sluit hierdie gedeelte aan by Joh 2:1-11?  (Dink aan die simboliek van die water in die reinigingskanne van die Jode wat vervang word met wyn wat in ‘n ander klas is)